Tuesday, September 26, 2017 Last Updated 8 Min 26 Sec ago English Edition
Todays E paper
Ads by Google
Monday 17 Jul 2017 12.13 AM

ബാലന്‍സ്‌ഡ് ഫണ്ടുകളെ അറിഞ്ഞ്‌ നിക്ഷേപിക്കാം

ജീവിതം തന്നെ ഒരു ബാലന്‍സിങ്‌ ആക്‌റ്റാണ്‌. വരവും ചെലവും തമ്മില്‍, അധ്വാനവും വിശ്രമവും തമ്മില്‍, സന്തോഷവും ദു:ഖവും തമ്മില്‍ എല്ലാം ഒരു സന്തുലനം എല്ലാവരും ആഗ്രഹിക്കുന്ന ഒന്നാണ്‌. രണ്ടിലേതു കൂടിയാലും കുറഞ്ഞാലും ജീവിതത്തിന്റെ താളം തെറ്റും. എന്നാല്‍ നിര്‍ദിഷ്‌ട അളവില്‍ പോയാലോ, സര്‍വ്വം സുരഭിലം. മൂച്വല്‍ ഫണ്ട്‌ സമൂഹത്തില്‍പ്പെട്ട ബാലന്‍സ്‌ഡ് ഫണ്ടുകള്‍ ഇവ്വിധമായ സന്തുലിതാവസ്‌ഥകൊണ്ട്‌ ശ്രദ്ധേയരാണ്‌. നാം അറിയേണ്ടതും പ്രയോജനപ്പെടുത്തേണ്ടതുമായ കുറേയേറേ സവിശേഷതകള്‍ ബാലന്‍സ്‌ഡ് ഫണ്ടിനുണ്ട്‌. അതില്‍ ആദ്യത്തേത്‌ ആസ്‌തി അനുപാതം തന്നെ.

ആസ്‌തി അനുപാതം

ഓഹരി അധിഷ്‌ഠിത മ്യൂച്വല്‍ ഫണ്ട്‌ സ്‌കീമുകള്‍ എല്ലാം തന്നെ 100 ശതമാനത്തോളം ഓഹരിയില്‍ നിക്ഷേപിക്കുന്നവയാണ്‌. അതില്‍ വളരെ ചെറിയ ഒരനുപാതം ഹ്രസ്വകാലത്തേക്ക്‌ ക്യാഷായി സൂക്ഷിക്കാറുണ്ട്‌. അവസരാനുസൃതം നിക്ഷേപിക്കാന്‍. എന്നാല്‍ ബാലന്‍സ്‌ഡ് ഫണ്ടുകള്‍ 35 ശതമാനത്തോളം കടപത്രാധിഷ്‌ഠിത നിക്ഷേപങ്ങള്‍ ആവാം. ഓഹരിയധിഷ്‌ഠിത ഫണ്ടെന്നുള്ള സ്‌ഥാനം നിലനിര്‍ത്തിക്കൊണ്ടുതന്നെ. നിയമവും അതുതന്നെയാണ്‌ അനുശാസിക്കുന്നത്‌.
65 ശതമാനമോ അതിലധികമോ ഓഹരിയധിഷ്‌ഠിത നിക്ഷേപമുള്ള ഒരു സ്‌കീമിന്‌ ഓഹരി നിക്ഷേപത്തിന്‌ സമാനമായ നികുതി ഇളവുകള്‍ ലഭിക്കും. എന്നാല്‍ ഇതു കണക്കാക്കി ഒരു നിക്ഷേപകന്‍ തന്റെ പക്കലുള്ള 100 രൂപയില്‍ നിന്ന്‌ 65 രൂപ ഓഹരിയിലും, 35 രൂപ കടപത്രത്തിലും നിക്ഷേപിക്കുമ്പോള്‍ ഈ നികുതിയിളവ്‌ ലഭിക്കില്ല. ബാലന്‍സ്‌ഡ് ഫണ്ട്‌ പോലെയുള്ള സ്‌കീമുകള്‍ക്ക്‌ മാത്രമേ ഈ നികുതിയിളവ്‌ ബാധകമുള്ളൂ.

നികുതിയിളവ്‌

സാധാരണ കടപത്രാധിഷ്‌ഠിത നിക്ഷേപത്തില്‍ നിക്ഷേപിച്ച്‌ മൂന്ന്‌ വര്‍ഷത്തിനുള്ളില്‍ കൈപ്പറ്റുന്ന ലാഭത്തിന്‌ നികുതിയടയ്‌ക്കേണ്ടതുണ്ട്‌. ലാഭവിഹിതം എത്രയാണോ അത്‌ ആ സാമ്പത്തിക വര്‍ഷത്തിലെ മൊത്ത വരുമാനത്തിന്റെ കൂടെ ചേര്‍ക്കപ്പെടും. അപ്പോള്‍ ബാലന്‍സ്‌ഡ് ഫണ്ടിലെ 35 ശതമാനം കടപത്രാധിഷ്‌ഠിത നിക്ഷേപത്തിന്‌ എന്താണ്‌ സംഭവിക്കുക ? ബാലന്‍സ്‌ഡ് ഫണ്ട്‌ ഓഹരിയധിഷ്‌ഠിത സ്‌കീമിന്റെ പട്ടികയില്‍ പെടുത്തിയതുകൊണ്ട്‌ ഒരു വര്‍ഷത്തിന്‌ ശേഷം കിട്ടുന്ന ലാഭത്തിന്‌ നികുതിയടയ്‌ക്കേണ്ട ആവശ്യം വരുന്നില്ല.
ഉദാ: ഒരാള്‍ പത്തുലക്ഷം രൂപ ബാലന്‍സ്‌ഡ് ഫണ്ടില്‍ നിക്ഷേപിക്കുകയും ഒരു വര്‍ഷത്തിനു ശേഷം ഇതിന്‌ 15 ശതമാനം വളര്‍ച്ച ഉണ്ടായി എന്നിരിക്കട്ടെ. ആ വളര്‍ച്ചയില്‍ 3.5 ലക്ഷം വരുന്ന കടപത്ര നിക്ഷേപത്തിനും പങ്കുണ്ട്‌. എന്നാല്‍ ഇതില്‍ നിന്ന്‌ ലാഭത്തുകയായ 1.5 ലക്ഷം രൂപ പിന്‍വലിക്കുമ്പോഴും നികുതിയിനത്തില്‍ ഒന്നും തന്നെ നിക്ഷേപകന്‌ അടയ്‌ക്കേണ്ടി വരുന്നില്ല.

കുറഞ്ഞ
റിസ്‌ക്

കടപത്രാധിഷ്‌ഠിത നിക്ഷേപങ്ങള്‍ ഓഹരികളിലേതുപോലെ വല്ലാത്ത വിലവ്യതിയാനങ്ങള്‍ നേരിടുന്ന ഒന്നല്ല. അതുകൊണ്ട്‌ തന്നെ ഓഹരി നിക്ഷേപത്തിനേക്കാളും റിസ്‌ക് കുറഞ്ഞ നിക്ഷേപമായിട്ടാണ്‌ കരുതപ്പെടുന്നത്‌. നിക്ഷേപത്തുകയുടെ 35 ശതമാനത്തോളം (പല സ്‌കീമുകളിലും ഈ അനുപാതം വ്യത്യാസപ്പെട്ടിരിക്കും) കടപ്പത്രാധിഷ്‌ഠിത നിക്ഷേപങ്ങളിലേക്കായതുകൊണ്ട്‌ മറ്റു ഓഹരിയധിഷ്‌ഠിത സ്‌കീമുകളെയപേക്ഷിച്ച്‌ റിസ്‌ക് കുറവായിരിക്കും.
എന്നാല്‍ ദീര്‍ഘകാല നിക്ഷേപങ്ങളില്‍ മറ്റു പദ്ധതികളോട്‌ കിടപിടിക്കുന്ന വളര്‍ച്ച ഇവ കൈവരിച്ചതായും കാണാന്‍ സാധിക്കും. എന്നാല്‍ ഓഹരിയധിഷ്‌ഠിത സ്‌കീമുകളേക്കാള്‍ മെച്ചപ്പെട്ട വളര്‍ച്ച ഇവയില്‍ നിന്ന്‌ പ്രതീക്ഷിക്കാനാവില്ല. റിസ്‌ക് കുറയുമ്പോള്‍ അതിനനുസരിച്ച്‌ വളര്‍ച്ചയും കുറയുമെന്ന്‌ നമുക്ക്‌ അറിയാമല്ലോ.

നിക്ഷേപ സ്വഭാവം

ബാലന്‍സ്‌ഡ് സ്‌കീമുകളില്‍ തന്നെ രണ്ടു വിഭാഗമുണ്ട്‌. സാധാരണ അധികം ചൂഴ്‌ന്നിറങ്ങി വിശകലനം ചെയ്യേണ്ട ആവശ്യമില്ലെങ്കിലും ഈയൊരു വിവരവും കൂടി അറിഞ്ഞിരിക്കുന്നത്‌ നല്ലതാണ്‌. താഴെയുള്ള ടേബിള്‍ ഒന്നു ശ്രദ്ധിക്കുക. ഇത്‌ നിക്ഷേപങ്ങളിലെ റിസ്‌കിനെയാണ്‌ സൂചിപ്പിക്കുന്നത്‌. ഓഹരികളില്‍ നിക്ഷേപിക്കുക എന്നാല്‍ നാം ആ ബിസിനസില്‍ പങ്കാളികളാകുക എന്നാണ്‌ അര്‍ത്ഥം.
ഒരു ബിസിനസില്‍ നിന്ന്‌ ലാഭം നേടാന്‍ വര്‍ഷങ്ങള്‍ എടുക്കാം എന്നതുകൊണ്ട്‌ തന്നെ ഓഹരി നിക്ഷേപം ഹ്രസ്വകാലത്തേക്ക്‌ റിസ്‌ക് കൂടിയതും എന്നാല്‍ ദീര്‍ഘകാലത്തേക്ക്‌ ചെയ്‌താല്‍ റിസ്‌ക് കുറഞ്ഞതുമാണ്‌. കടപത്രങ്ങളുടെ സ്വഭാവം നേരെ തിരിച്ചാണ്‌.
ഒരു ലളിതമായ ഉദാഹരണം കൊണ്ട്‌ ഇത്‌ മനസ്സിലാക്കാം. നിങ്ങളുടെ സുഹൃത്ത്‌ നിങ്ങളോട്‌ കുറച്ച്‌ പണം കടം ചോദിക്കുന്നു. അയാള്‍ അത്‌ ഒരു മാസത്തിന്‌ ശേഷം തിരികെ നല്‍കാമെന്നേല്‍ക്കുമ്പോഴാണോ, ഒരു വര്‍ഷം കഴിഞ്ഞ്‌ തിരികെ നല്‍കാമെന്നേല്‍ക്കുമ്പോഴാണോ റിസ്‌ക് കൂടുതല്‍? തീര്‍ച്ചയായും സമയ ദൈര്‍ഘ്യം കൂടുമ്പോള്‍ റിസ്‌കും വര്‍ധിക്കും. അങ്ങനെ കടപത്ര നിക്ഷേപങ്ങളില്‍ സമയദൈര്‍ഘ്യം കൂടുന്തോറും റിസ്‌ക് കൂടുകയും അതുപോലെ പലിശ നിരക്ക്‌ കൂടുകയും ചെയ്യും.
ബാലന്‍സ്‌ഡ് ഫണ്ടുകള്‍ തങ്ങളുടെ നിക്ഷേപങ്ങളിലെ ഓഹരി വിഹിതം ആസ്‌തിയില്‍ മുമ്പന്‍മാരായുള്ള കമ്പനികളില്‍ നിക്ഷേപിക്കുകയും (ന്തന്റത്സദ്ദനു ങ്കന്റണ്മ ങ്കഗ്നണ്ഡണ്മന്റദ്ധനുന്ഥ), കടപത്ര വിഹിതം ഹ്രസ്വകാല ബോണ്ടുകളില്‍ വിന്യസിക്കുകയും ചെയ്‌താല്‍ ആ സ്‌കീമുകളുടെ മൊത്തത്തിലുള്ള റിസ്‌ക് കുറഞ്ഞു നില്‍ക്കും. നേരെ തിരിച്ചാണെങ്കില്‍ റിസ്‌കും റിട്ടേണും കൂടും.
നഷ്‌ടം
കുറയ്‌ക്കാം

ഓഹരിയധിഷ്‌ഠിത നിക്ഷേപങ്ങളില്‍ വിലവ്യതിയാനം കാണപ്പെടും. അതുകൊണ്ട്‌ ഹ്രസ്വകാലത്തേക്ക്‌ നിക്ഷേപിക്കുക എന്നത്‌ ബുദ്ധിപരമല്ല. എത്‌ കാലയളവിലേക്കായാലും ബാലന്‍സ്‌ഡ് ഫണ്ടില്‍ കടപ്പത്രങ്ങളുടെ സാന്നിധ്യം മൂലം ഒരു സ്‌ഥിര വരുമാനം ഉണ്ടായിക്കൊണ്ടിരിക്കും.
65 ശതമാനം വരുന്ന ഓഹരി വിഹിതത്തില്‍ വരുന്ന വിലവ്യതിയാനങ്ങളുടെ പ്രഭാവം കുറയ്‌ക്കാന്‍ ഇത്‌ സഹായിക്കും. അതുകൊണ്ട്‌ തന്നെ ആദ്യമായി ഓഹരി നിക്ഷേപങ്ങളിലേക്ക്‌ കടന്നുവരുന്നവര്‍ക്ക്‌ അനുയോജ്യമായ ഒന്നാണ്‌ ബാലന്‍സ്‌ഡ് ഫണ്ട്‌.
ഒരാള്‍ക്ക്‌ പത്തു സ്‌കീമുകളില്‍ നിക്ഷേപമുണ്ടെങ്കില്‍ അതില്‍ രണ്ടെണ്ണമെങ്കിലും ബാലന്‍സ്‌ഡ് ഫണ്ടായിരിക്കാന്‍ ശ്രദ്ധിക്കണം. മേല്‍ പറഞ്ഞ ഘടകങ്ങളിലൂടെ ഒന്ന്‌ കണോടിച്ചതിനുശേഷം സ്‌കീമുകള്‍ തിരഞ്ഞെടുക്കാവുന്നതാണ്‌.

വിജയാനന്ദ പ്രഭു

Ads by Google
Advertisement
Monday 17 Jul 2017 12.13 AM
YOU MAY BE INTERESTED
Ads by Google
Ads by Google
TRENDING NOW